កណ្តាល៖ ក្មេងសិស្សសាលាប្រុសស្រីចំនួន ៤នាក់បានលង់ទឹកស្លាប់ពេលចុះទៅរាវលៀសក្នុងជម្រៅទឹក៤ ទៅ៥ម៉ែត្រ កាលពីល្ងាចថ្ងៃទី២៩ ខែវិច្ឆិកា ឆ្នាំ២០២២ ស្ថិតក្នុងភូមិព្រៃសំរោង ឃុំដំណាក់អំពិល ស្រុកអង្គស្នួល ខេត្តកណ្តាល។

អធិការដ្ឋាននគរបាលស្រុកអង្គស្នួល លោកវសេនីយ៍ឯក មាន សំណាង បានបញ្ជាក់ប្រាប់អ្នកសារព័ត៌មាន EAC ថា ក្មេងសិស្សសាលាដែលបានលង់ទឹកស្លាប់នោះ មានសិស្សប្រុស២នាក់ និងសិស្សស្រីចំនួន២នាក់។ ពួកគេមានអាយុចាប់ពី ៩ឆ្នាំ ទៅ១៣ឆ្នាំ។

បើតាមលោក មាន សំណាង គិតត្រឹមព្រលឹមម៉ោងជាង៤ ថ្ងៃទី៣០ ខែវិច្ឆិកា សាកសពរបស់សិស្សសាលាទាំង៤នាក់នោះត្រូវបានសមត្ថកិច្ចរុករកឃើញហើយ។

លោកអធិការដ្ឋាននគរបាលស្រុកអង្គស្នួល បានបញ្ជាក់ថា ក្មេងសិស្សសាលាទាំងពីរបានលង់ទឹកស្លាប់ ក្នុងអំឡុងពេលចុះទៅរាវលៀស ដោយរអិលធ្លាក់ក្នុងរណ្តៅទឹកជម្រៅ៤ ទៅ៥ម៉ែត្រ។

លោកបន្តថា សាកសពក្មេងទាំង៤នាក់នោះ ត្រូវបានបូជា និងធ្វើបុណ្យតាមប្រពៃណីនៅព្រឹកថ្ងៃនេះ នៅក្នុងវត្តដំណាក់អំពិល៕